اهمية التواصل الجيّد في العلاقات الاجتماعية

البشر بطبيعتهم كائنات حية اجتماعية يميلون الى التجمع و التواصل بين بعضهم. خلال التجمعات هذي، نقدر نكون علاقات يديدة مع ناس ثانيين. الناس اللي يعرفون يتواصلون مع الاهل و الاصدقاء يتميزون ببعض المهارات اللي بتكلم فيها الحين. هالمهارات هذي لاحظتها من واقع خبرتي في الحياة و اتمنى انها تفيدكم.

لصراحة: يفضل ان اثناء التواصل مع اي شخص، ان يكون الانسان صريح و واضح في كلامه. مثلا، ماله داعي تعطون وعود انتوا مو قدها. او تتداعون انكم تملكون مهارات و اشياء مو موجودة عندكم اصلا.
الامانة: في بعض العلاقات بين الناس تكون حميمة وعميقة. بعض الناس يفضلون شخص واحد يكون اهو/اهي اللي يتوجهونله اذا يبون يتكلمون في موضوع حساس و مايبونه يطلع برا علاقتهم. اذا انت/انتي كنت/ي هالشخص اللي اختاروك ان يفتحون قلبهم لك/ج، حاولوا تكونون قدها وتراعون مشاعر الناس هذي. ماله داعي اي شي ينقال لكم تروحون تقولونه حق ناس ثانيين.
المسؤولية: مع الوقت، راح تصير مواقف وظروف تخلي الواحد بموقف لازم يكون فيه مسؤول عن تصرفاته وافعاله. مثلا، اذا وعدتوا احد انكم تسوون شي معين، يا انكم تسوون هالوعد، او انكم تعلمون هالشخص انكم ماتقدرون. لما توعدوون احد و تبلغونه/ا بانكم ماتقدرون تسوون هالوعد مبجر، هالشخص يقدر يتصرف ويدبر اموره.
الاعتذار: شي طبيعي جدا ان يكون في سوء تفاهم. ساعات الناس يواجهون صعوبات انهم يوصلون الفكرة اللي في بالهم بشكل صحيح. عموما، لما الشخص يغلط، يفضل انه يعتذر ويعترف بالغلط. وفي شي مهم في ناس وايد مايستوعبون اهميته اللي اهو شنو يسوون بعد الاعتذار. بعد ما تعترفون بالغلط، سئلوا الشخص اللي غلطتوا بحقه شلون ممكن تعالجون هالغلط او تتجنبونه مرة ثانية.
الكتمان: هالشي وايد ناس يسوونه. لما الناس يشوفون شي يضايقهم، يسكتون ويطوفون. مع الوقت، الاشياء هذي تزيد و الناس تخش بقلبها لين ينفجرون. مع ان تقدرون تتجنبون كل هذا لو بس شرحتوا موقفكم من البداية. ساعات الشي اللي صج يضيايق بالكتمان اهو الكتمان نفسه. يعني قصدي ان اهي مو سالفة ان في شي موعاجبكم. لا، اهي سالفة انكم موقادرين تعبرون عن اللي بداخلكم. لاتخشون و خليكم واضحين مع الناس الباجي.
الاهتمام: سئلوا عن بعض. الناس مايدرون شنو الباحي قاعد يفكرون فيه، شنو شاغلهم، شنو ودهم يتكلمون عنه. ساعات لما انتوا تبلشون بالسؤال تكونون كسبتوا ثقة وحب انسان ثاني. ممكن تشوفون الناس مستانسين بس مخهم في وايد مشاكل شاغلتهم. وممكن العكس. احنا نميل الى ان نستنتج شنو حال هالشخص اللي جدامنا من شكله واسلوبه، بس مانفكر نساله اذا كان مرتاح او اذا في كلم وده يسولف فيه مع احد.
الوضوح: حاولوا تكونون واضحين كثر ماتقدرون. في اي موضوع واي مشكلة، لما الناس يكونون واضحين بكلامهم و افكارهم راح تكون علاقتهم وايد احسن.
طبعا في وايد مميزات ثانية حق العلاقات الاجتماعية الصحية/الناجحة. اتمنى ان هالموضوع يفيدكم. كتبت عن هالموضوع لان احنا تقريبا يوميا نسولف و نتيمع مع اهلنا وربعنا وحبيت اساعدكم بان تكون علاقاتكم صحية مع الكل.

ْ

________*التــَّـوْقـْـيـعُ*_________
لا أحد يظن أن العظماء تعساء إلا العظماء أنفسهم. إدوارد ينج: شاعر إنجليزي

» اهمية التواصل بين البيت والمدرسة
» اهمية الاسرة في المجتمع
» اهمية الاستماع
» اهمية التفكير الجانبي
» اهمية المطالعة عند الطفل